Crime News : अलिबागमध्ये दोन चिमुकल्यांचा झोपेतच मृत्यू झाल्याची धक्कादायक घटना घडली होती. आता त्यांच्या मृत्यूचं गूढ उकललं आहे. जन्मदात्या आईनेच पोटच्या लेकरांचा जीव घेतल्याचं तपासात समोर आलं आहे. याप्रकरणात पोलिसांनी आरोपी आईला अटक केली आहे.
Crime News : गेल्या आठवड्यात रायगड जिल्ह्यात अलिबाग येथे दोन लहान मुलींचा मृत्यू झाल्याची धक्कादायक घटना घडली होती. आता या मृत्यूमागचं मोठं धक्कादायक कारण समोर आलं आहे. अनैतिक संबंधात अडथळा ठरत असल्याच्या कारणावरुन जन्मदात्या आईनेच पोटच्या लेकरांचा गळा दाबून त्यांचा खून केल्याची धक्कादायक अशी घटना अलिबाग तालुक्यातील किहिम येथे घडली.
पोटचं लेकरु म्हणजे आईच्या काळजाचा तुकडा. लेकराला साधं खरचटलं तरी आईच्या काळजात धस्स होतं. मात्र, जन्मदात्या आईनेच पोटच्या एक नाही तर दोन्ही लेकरांचा जीव घेतला. याप्रकरणी मांडवा सागरी पोलिसांनी आरोपी महिलेला सोमवारी (८ एप्रिल) सायंकाळी ताब्यात घेतले. शितल सदानंद पोले (वय २५) असं आरोपी महिलेचं नाव आहे. अनैतिक संबंधात ही दोन्ही मुलं अडथळा ठरत होती. यामुळे प्रियकरासाठी आईने पोटच्या मुलांनाच संपवलं. आईच्या कृत्याने केवळ अलिबागच नाही तर संपूर्ण रायगड जिल्हा हादरुन गेला. अवघ्या पाच वर्षांची आराध्या सदानंद पोले आणि तीन वर्षाचा सार्थक सदानंद पोले यांची जन्मदाती आईच त्यांचा कर्दनकाळ ठरेल, याची कल्पनाही कोणी केली नसेल. आईवर मोठ्या विश्वासाने बागडणाऱ्या त्या चिमुकल्यांना केवळ प्रियकरासाठी तिने ठार मारले अशी माहिती पोलिस तपासात समोर आली आहे.
पोलिसांनी दिलेल्या माहितीनूसार, संशयित आरोपी शितल पोलेचे गावाकडील तरुणासोबत प्रेमसंबंध होते. तिला त्याच्यासोबत संसार थाटायचा होता. मात्र, ही दोन्ही मुलं त्यात अडथळा ठरत होती. प्रियकराला मुलं नको होती. अशातच मुलगी आराध्या आई सतत फोनवर बोलत असल्याचे वडिलांना सांगत होती. अखेर शितलने घरात कोणीही नसल्याचा फायदा घेत दोन्ही मुलांच्या नाकातोंडावर कपडा बांधला आणि हाताने तोंड दाबून त्यांचा श्वास कोंडला. तिने मोठ्या शिताफिने मुले झोपेतच बेशुद्ध झाल्याचा कांगावा केला. ३१ मार्चला या मुलांची हत्या करण्यात आली होती.
या बालकांच्या मृत्यूमुळे संशय निर्माण झाल्याने त्यांचा विसेरा आणि शवविच्छेदन करुन सोमवारी १ एप्रिला मृतदेह पालकांच्या ताब्यात देण्यात आले. या मुलांच्या पार्थिवावर अंतिम विधी करण्यासाठी त्यांचे नातेवाईक त्यांच्या मूळगावी पुसद-यवतमाळ येथे घेऊन गेले. पोलिस या घटनेचा कसून तपास करीत होते. अखेर एक धागा सापडला आणि पोलिस चिमुकल्यांच्या मारेकऱ्यापर्यंत पोहोचले. याप्रकरणी उपविभागीय पोलीस अधिकारी, मांडवा सागरी पोलीस ठाण्याचे सहाय्यक पोलिस निरीक्षक सोमनाथ लांडे, रायगड स्थानिक गुन्हे अन्वेषण शाखेचे पोलिस निरीक्षक बी.बी.खाडे यांनी आरोपीला पकडण्यात मोलाची कामगिरी केली.